23-25 ნოემბერს, „ფონდი ტასოს“ ორგანიზებით, საირმეში სათემო ფონდებისა და პარტნიორი ორგანიზაციების სამუშაო შეხვედრები გაიმართა. შეხვედრებზე მოვიწვიეთ როგორც ჩვენთან მუშაობის მრავალწლიანი გამოცდილების მქონე, ისე ახლადშექმნილი სათემო ფონდები.

ორგანიზაციების წარმომადგენლებმა შეხვედრის მონაწილეებს თავიანთი ფონდები გააცნეს, ისაუბრეს „ფონდ ტასოსთან“ მუშაობის გამოცდილებასა და რეგიონებში არსებულ გამოწვევებზე, აგრეთვე, შეაჯამეს ორწლიანი გრანტგამცემი საქმიანობის ფარგლებში ჩატარებული აქტივობები. 24 ნოემბერს სათემო ფონდებს ჩვენი პარტნიორი ორგანიზაციები შემოუერთდნენ.

25 ნოემბრის შეხვედრის პირველი ნაწილი ჩატარებული სამუშაოების შეჯამებასა და გენდერული ძალადობის წინააღმდეგ 16 დღიანი კამპანიის შესახებ ინფორმაციის გაზიარებას დაეთმო. „ფონდი ტასოს“ კომუნიკაციის სპეციალისტი, ია შალამბერიძე მონაწილეებს ქალთა საკითხების გაშუქებაზე ესაუბრა.

სპეციალურად მოწვეული სპიკერი, „ღია საზოგადოების ფონდის“ სოციალური სამართლიანობის პროგრამის მენეჯერი, ანანო ცინცაბაძე მონაწილეებს თემაზე „სამოქალაქო საზოგადოება დღეს - საფრთხეები და შესაძლებლობები“ ესაუბრა.

შეხვედრებს ლილი ფულარიანი უძღვებოდა. ჯამში, სამდღიან შეკრებას საქართველოს სხვადასხვა რეგიონიდან ცხრა სათემო ფონდი და 23 პარტნიორი ორგანიზაცია ესწრებოდა.